Indhuhu waa inay arkaan meel ayna boqortooyada Eebbe gaadhin.

Xer kastaa wuxuu u baahan yahay in lagu qalabeeyo inuu arko halka Boqortooyada Eebbe ka maqan tahay. Waxaa inagu hareeraysan meelo badan oo doonista Eebbe aan dhulka looga samayn sida samada looga sameeyo. Waxaa jira farqiyo waaweyn oo jabnaan, xanuun, silcin, silic, iyo xataa dhimasho ay qayb ka yihiin nolol maalmeedka caadiga ah. Inta aynu dhulkan joogno, farqiyadaas waa waxa aynu ugu shaqaynayno inaanu xidhno annagoo u adeegayna Boqortooyada.

Indhaheenna oo u furma inaan aragno halka Boqortooyada Eebbe ka maqan tahay, iyo inaan gaadhno dadka aynu naqaan iyo dadka aynaan weli aqoon, waa sida xertu u taranto oo Boqortooyada Eebbena ay si fog oo dhakhso leh ugu korto.

Waxaan u baahanahay inaan aragno farqiga u dhexeeya doonista Eebbe oo dhulka si qumman looga sameeyo iyo xaaladda hadda jirta. Tani waa inay ka dhacdaa laba goobood:

Xidhiidhada Joogtada ah

Goobta kowaad waa xidhiidhadeenna joogtada ah. Kuwaas waxaa ka mid ah saaxiibbadeenna, qoyskeenna, dadka aynu wada shaqayno, dadka aynu wax wada baranno, iyo laga yaabee deriskeenna. Tani waa sida Injiilku ugu safro sida ugu dhakhsaha badan. Daryeelka dadkaas waa wax dabiici ah. Luukos 16:19-31 waxaynu ku aragnaa in xataa ninkii taajirka ahaa ee jahannamada ku silcayay uu jacayl iyo welwel noocaas ah u qabay qoyskiisa. Dadkan Eebbe ayaa nolosheenna dhigay, waana inaan xidhiidhadaas si wanaagsan ugu maamulno jacayl, samir, iyo adkaysi.

Waxaad kuwa Ciise raaca ku baraarujin kartaa kooxdan dadka ah adigoo ku dhiirrigelinaya inay qoraan 100 qof oo ay yaqaannaan. Ku dhiirrigeli inay u qaybiyaan saddex kooxood: kuwa Masiixa raaca, kuwa aan Masiixa raacin, iyo kuwa aan xaaladdooda ruuxiga ah la garanayn.

Markaas waxay raadin karaan inay qalabeeyaan oo dhiirrigeliyaan kuwa Masiixa raaca si ay u noqdaan kuwo miro badan dhala oo daacad ah. Waxay kaloo bilaabi karaan inay raadiyaan siyaabo ay kuwa aan weli Masiixa raacin ugu hoggaamiyaan Boqortooyada oo ay xer uga dhigaan.

Dadka iyo Xidhiidhada Ka Baxsan Xidhiidhada Joogtada ah

Goobta labaad ee aragga halka Boqortooyada Eebbe ka maqan tahay waxay khusaysaa dadka ka baxsan xidhiidhadeenna joogtada ah ama dadka aynu naqaan. Ciise wuxuu xertiisa amray inay qoomiyad kasta oo dhulka ku nool xer ka dhigaan.

Wuxuu ku amray inay xer ka dhigaan meesha ay markaas joogeen, meelaha u dhow, dadka iyaga ka duwan, iyo xataa ilaa darafyada dhulka. Tani waa sida Injiilku ugu safro meesha ugu fog. Tani ma aha wax dabiici ah. Waa wax ka sarreeya dabiiciga. Waa caddayn muujinaysa shaqada Ruuxa Qudduuska ah ee nolosheenna.

Eebbe wuxuu leeyahay kuwo uu si gaar ah u jecel yahay. Kuwaas waa kuwa ugu yar, kuwa ugu dambeeya, iyo kuwa lumay. Sidaas darteed waa inaan nolosheenna ku bixinnaa inaan u adeegno dadka inoo dhow oo keliya ma aha, balse sidoo kale kuwa ku jira meelaha dunida ee gudcurka ruuxiga ahi ugu badan yahay. Eebbe kibirlayaasha wuu ka gees yahay, kuwa is-hoosaysiiya se nimco buu siiyaa. Waa inaan u adeegno kuwa baahan. Inta badan kuwa baahani waa kuwa ugu is-hoosaysiinta badan. Dadkaas oo kale waa inaan si gaar ah u raadinnaa oo u maalgelinnaa kuwa daacadda ah.

Xusuusta in daacadnimadu ay ka muuqato addeecidda waxa Eebbe muujiyo iyo in lala wadaago dadka kale. Dadkani waxay la mid yihiin dhulkii wanaagsanaa ee masaalkii Ciise. Waa kuwa soo saara 30-laab, 60-laab, ama 100-laab. Ma aha kuwa qalbi adag leh ee farriinta diida. Ma aha kuwa ka taga marka silcintu timaaddo. Ma aha kuwa mashquuliya welwelka dunidan ama maalka. Waxay la mid yihiin ninkii jinnigu ku jiray ee reer Geraaseen oo adeegga Ciise kaga jawaabay addeecid iyo la wadaagid wixii Eebbe u sameeyey. Sidaas darteed, markii Ciise mar dambe gobolkaas ku soo noqday, dad badan ayaa isaga doonayay.