Mar walba oo ay laba Kiniisadood wax iska gaashadaan

Ciise wuxuu xertiisa faray inay si joogto ah u bilaabaan qoysas ruuxi ah oo cusub, ay ka caawiyaan inay Ciise u ekaadaan, oo ay baraan sida iyaguna u bilaabaan qoysas ruuxi ah oo cusub. Haddaba sidee ayay labadan arrimood isugu imanayaan - sidee ayaynu qayb uga noqon karnaa kiniisad annagoo isla mar ahaantaana ku jirna geeddi-socodka bilaabidda kiniisado cusub?

Erayga Eebbe dhexdiisa waxaynu ka baranaynaa in qorshihiisa qummani yahay inaynu u noolaano sida qoys ruuxi ah. Baybalku qoyskaas wuxuu uga hadlaa sidii kiniisad oo saddex qaab ah:

• Kiniisadda guud -- isu-imaatinka dhammaan rumaystayaashii jiray, kuwa hadda jira, iyo kuwa jiri doona.
• Kiniisadda magaalada ama gobolka -- isu-imaatinka dhammaan rumaystayaasha ku nool magaalo ama qayb dalka ka mid ah.
• Kiniisadda fudud -- isu-imaatinka rumaystayaasha ku kulma koox yar, sida guri ama dhisme.

Bal qiyaas kiniisad fudud oo ka kooban afar qoys. Kiniisaddan aasaasiga ahi waa meesha qoysaskani nolosha wadaagaan - waa walaalaha ku dhiirrigeliya jacayl iyo camallo wanaagsan. Hadda qiyaas in mid kasta oo afarta lammaane ah uu ka shaqaynayo bilaabidda qoys ruuxi ah oo cusub. Kaqaybgalka ay ku leeyihiin ma aha sidii ay uga qaybgalaan qoyskooda yar ee ruuxiga ah, balse waxay ka caawinayaan TUSAALE U NOQOSHO iyo GACAN SIIN inta qoys ruuxi ah oo cusub bilaabmayo oo korayo. Hal kiniisad fudud gudaheeda afar kiniisadood oo cusub ayaa isla wakhti isku mid ah ka bilaabmaya.

Tani waa tusaale muujinaya sida degdegga ah ee Eebbe u kori karo qoyskiisa. Sidan ayay kiniisaddu u kordhin kartaa xawaaraheeda.

Haddaba maxaa ku dhacaya kiniisadahan oo dhan markay koraan oo ay bilaabaan kiniisado cusub oo iyaguna bilaaba kiniisado cusub oo kale? Sidee ayay isku xidhan u sii ahaanayaan? Sidee ayay ugu noolaanayaan nolol wadajir ah iyagoo ah qoys ruuxi ah oo fidsan? Jawaabtu waxay tahay in kiniisadahaan fudud oo dhan ay la mid yihiin unugyada jidh koraya, oo ay isku xirmaan dabadeedna ay shabakad u noqdaan kiniisad magaalo ama gobol. Kiniisaduhu way isku qaraabo yihiin. Waxay wadaagaan isla DNA-da ruuxiga ah. Dhammaantood waxay ka wada yimaadeen isla qoyskii ugu horreeyey ee tarmayey. Haddana - iyadoo hagid jirto - waxay isu yimaadaan sidii jidh ka weyn si ay wax ka sii badan u qabtaan.