3/3 گروپ میٹنگ کا نمونہ

ایک 3/3 گروپ (اِسے “تھری تھرڈز” کہا جاتا ہے) وہ گروہ ہے جو اپنے اکٹھے وقت کو 3 حصّوں میں تقسیم کرتا ہے۔ یہ نمونہ خُداوند کی پچھلی راہنمائیوں کے ساتھ دیانت داری، خُداوند سے مل کر سُننے، اور خُداوند کی دی ہوئی ہدایت کے مطابق قریب کے وقت میں فرمانبرداری کی منصوبہ بندی پر زور دیتا ہے۔

یہ 3/3 نمونہ سادہ کلیسیا (یا گھریلو کلیسیا)، قیادتی سیل، یا ہم رتبہ رہنمائی کے گروہ کے لئے استعمال کیا جا سکتا ہے۔

یہ اِس طرح کام کرتا ہے:

• پیچھے دیکھیں - گروہ کے وقت کا پہلا تہائی حصہ اِس بات کو دیکھنے میں گزرتا ہے کہ پچھلی ملاقات کے بعد کیا ہوا۔
• اُوپر دیکھیں - گروہ کے وقت کا درمیانی تہائی حصہ کلامِ مقدس، گفتگو، اور دُعا کے ذریعے خُدا کی حکمت اور راہنمائی حاصل کرنے میں گزرتا ہے۔
• آگے دیکھیں - گروہ کے وقت کا آخری تہائی حصہ اِس بات پر غور کرنے میں گزرتا ہے کہ ہر شخص جو کچھ سیکھا ہے اُسے کیسے اپنی زندگی میں لاگو کرے اور اُس پر عمل کرے۔

3/3 میٹنگ کا خاکہ

پیچھے دیکھیں [آپ کے وقت کا 1/3]

نگہداشت اور دُعا: وقت نکالیں تاکہ ہر شخص کوئی ایسی بات بتائے جس کے لئے وہ شکرگزار ہے۔ پھر ہر شخص کوئی ایسی بات بھی بانٹے جس میں وہ جدوجہد کر رہا ہے۔ جو شخص اُس کے دائیں طرف ہو، وہ اُن باتوں کے لئے اُس کے حق میں دُعا کرے۔ اگر کوئی ایسی مشکل میں ہو جس کے لئے زیادہ توجہ درکار ہو، تو اُس شخص کی نگہداشت کے لئے میٹنگ کے بعد رُکیں۔

رویا: مل کر گانے میں وقت گزاریں اور گیتوں کے الفاظ کو خُدا سے محبت، دوسروں سے محبت، دوسروں کے ساتھ یسوع کو بانٹنے، نئے گروہ شروع کرنے، اور دوسروں کی بھی اِس میں مدد کرنے جیسے موضوعات کے ساتھ جوڑیں۔ متبادل طور پر، لوگ بائبل کے ایسے حوالے بھی بانٹ سکتے ہیں جو اِن موضوعات کو ظاہر کرتے ہوں۔

جائزہ: ہر شخص یہ بتائے کہ پچھلے ہفتے اُس نے اُن وعدوں کے بارے میں کیا کیا جو اُس نے لکھے تھے:

• آپ نے جو کچھ سیکھا، اُس پر کیسے عمل کیا؟
• آپ نے جو کچھ سیکھا، اُس میں آپ نے کس کو تربیت دی؟
• آپ نے اپنی کہانی یا خُدا کی کہانی کس کے ساتھ بانٹی؟

اگر وہ کسی وعدے کو پورا کرنا بھول گئے ہوں یا اُنہیں ایسا کرنے کا موقع نہ ملا ہو، تو پچھلے ہفتے کے وہ وعدے اِس ہفتے کے وعدوں میں شامل کر دیے جائیں۔ اگر کوئی شخص اُس بات پر عمل کرنے سے صاف انکار کرے جو اُس نے واضح طور پر خُدا سے سُنی ہو، تو اِسے کلیسیائی نظم و ضبط کا مسئلہ سمجھا جانا چاہیے۔

اُوپر دیکھیں [آپ کے وقت کا 1/3]

دُعا کریں: خُدا سے سادہ اور مختصر طور پر بات کریں۔ خُدا سے کہیں کہ وہ آپ کو اِس حوالے کی تعلیم دے۔

پڑھیں اور گفتگو کریں: اِس ہفتے کا حوالہ پڑھیں۔ پھر اِن سوالات پر گفتگو کریں:

• آپ کو اِس حوالے میں کیا اچھا لگا؟
• اِس حوالے میں آپ کو کون سی بات مشکل یا سمجھنے میں سخت لگی؟

اِس ہفتے کا حوالہ دوبارہ پڑھیں۔

• اِس حوالے سے ہم لوگوں کے بارے میں کیا سیکھ سکتے ہیں؟
• اِس حوالے سے ہم خُدا کے بارے میں کیا سیکھ سکتے ہیں؟

آگے دیکھیں [آپ کے وقت کا 1/3]

عمل کریں۔ تربیت دیں۔ بانٹیں۔ کم از کم پانچ منٹ خاموش دُعا میں گزاریں۔ گروہ میں موجود ہر شخص دُعا کرے کہ رُوح القدس اُسے دکھائے کہ اِن سوالات کا جواب کیسے دینا ہے، پھر وعدے کرے۔ ہر شخص کو اپنے وعدے لکھ لینے چاہئیں تاکہ وہ لوگوں کے لئے سمجھ بوجھ کے ساتھ دُعا کر سکیں اور اُن کا احتساب بھی ہو سکے۔ ممکن ہے کہ وہ ہر ہفتے ہر سوال کے بارے میں کچھ نہ سُنیں۔ اگر وہ کوئی ایسا جواب بانٹیں جس کے بارے میں اُنہیں یقین نہ ہو کہ وہ خُدا سے سُنا گیا ہے، لیکن وہ اُسے اچھا خیال سمجھتے ہوں، تو اِس بات کو بھی نوٹ کر لینا چاہیے کیونکہ اُس صورت میں احتساب ایک مختلف درجے پر ہوگا۔

• میں اِس حوالے کو اپنی زندگی میں کیسے لاگو کروں گا اور اِس پر کیسے عمل کروں گا؟
• میں اِس حوالے کے بارے میں کس کو تربیت دوں گا یا کس کے ساتھ اِسے بانٹوں گا؟
• اِس ہفتے خُدا چاہتا ہے کہ میں اپنی کہانی [گواہی] اور/یا خُدا کی کہانی کس کے ساتھ بانٹوں؟

مشق: دو یا تین کے گروہوں میں اُس بات کی مشق کریں جس کے لئے آپ نے سوال 5، 6 یا 7 میں عہد کیا ہے۔ مثال کے طور پر، کسی مشکل گفتگو کا کردار ادا کریں یا کسی آزمائش کا سامنا کرنے کی مشق کریں؛ آج کے حوالے کی تعلیم دینے کی مشق کریں، یا خوشخبری بانٹنے کی مشق کریں۔

خُدا سے بات کریں: اُسی دو یا تین کے گروہوں میں ہر فرد کے لئے الگ الگ دُعا کریں۔ خُدا سے کہیں کہ وہ اُن لوگوں کے دل تیار کرے جو اِس ہفتے یسوع کے بارے میں سُنیں گے۔ اُس سے مانگیں کہ وہ آپ کو اپنے وعدوں پر عمل کرنے کے لئے طاقت اور حکمت دے۔ یہی میٹنگ کا اختتام ہے۔