တပည့်တော်များ ရင့်ကျက်လာအောင် ကွင်းဆက်သင်တန်းပေးခြင်း

ကွင်းဆက် သင်တန်းပေးခြင်းကို ဝိညာဉ်ရေးရာ ကြီးထွားမှု၏ မတူညီသော အဆင့် လေးဆင့်အားဖြင့် တပည့်တော်များ ရင့်ကျက်လာစေရန် အသုံးပြုပါသည်။

ထိုအဆင့်များမှာ - စံပြခြင်း၊ ကူညီခြင်း၊ ကြည့်ရှုခြင်း၊ တာဝန်ပေးခြင်း တို့ ဖြစ်ပါသည်။

ကွင်းဆက် သင်တန်းပေးခြင်းသည် တပည့်တော်တစ်ဦးကို စွမ်းရည်တစ်ခု သို့မဟုတ် စည်းကမ်းတစ်ခုတွင် အသစ်အခြေအနေမှ စတင်ကာ ထိုစွမ်းရည်တွင် နည်းပြအကူအညီ မလိုတော့သည့်အထိ သူ၏ ကျွမ်းကျင်နိုင်စွမ်းကို ကြီးထွားစေပါသည်။ တပည့်တော်များနှင့် တပည့်တော်မွေးထုတ်သူများစွာသည် ကွင်းဆက် သင်တန်းပေးခြင်း၏ အစောပိုင်းအဆင့်များ (စံပြခြင်း၊ ကူညီခြင်း) တွင် ပိတ်မိနေတတ်ကြပြီး၊ တတိယအဆင့် (ကြည့်ရှုခြင်း) တွင် အချိန် လုံလောက်စွာ မသုံးကြသကဲ့သို့ စတုတ္ထအဆင့် (တာဝန်ပေးခြင်း) အတိုင်း လွှတ်ပေးခြင်းကိုလည်း မလုပ်သလောက် နည်းပါးတတ်ကြပါသည်။

ကွင်းဆက် သင်တန်းပေးခြင်း ပုံစံသည် ဤကဲ့သို့ အလုပ်လုပ်ပါသည်။

ကွင်းဆက် သင်တန်းပေးခြင်းဆိုတာ ဘာလဲ။ ဤသို့ စဉ်းစားကြည့်ပါ။ စက်ဘီးစီးတတ်ရန် သင်ယူဖူးပါသလား။ အခြားတစ်ယောက်ကို သင်ပေးဖူးပါသလား။ အကယ်၍ သင်ပေးဖူးပါက ကွင်းဆက် သင်တန်းပေးခြင်းကို အတွေ့အကြုံအရ သိရှိပြီးသား ဖြစ်ဖို့ များပါသည်။

စံပြခြင်း

စံပြခြင်းပုံစံမှာ လက်တွေ့လေ့ကျင့်ခြင်း သို့မဟုတ် နည်းစနစ် ပုံဥပမာကို ပံ့ပိုးပေးခြင်း ဖြစ်ပါသည်။ ၎င်းဟာ သင်တန်းပေးခြင်း ကာလရဲ့ အတိုတောင်းဆုံးအပိုင်းလဲ ဖြစ်ပါသည်။ များသောအားဖြင့် တစ်ကြိမ်သာ လုပ်ဆောင်ရန် လိုအပ်ပါသည်။ လက်တွေ့လုပ်ဆောင်ရမည့် အရာ သို့မဟုတ် နည်းစနစ်တစ်ခု ရှိကြောင်းကို သတိပြုမိစေပြီး ဘယ်လို ပုံစံရှိသလဲဆိုတဲ့ ယေဘူယျ အကြံဉာဏ်ကို ပေးခြင်းသာ ဖြစ်ပါသည်။ စံပြခြင်းကို အကြိမ်ကြိမ် ထပ်လုပ်နေခြင်းသည် တစ်စုံတစ်ယောက်ကို မွမ်းမံတပ်ဆင်ပေးရန် ထိရောက်သော နည်းလမ်း မဟုတ်ပါ။ သူတို့ကို ကိုယ်တိုင် ထိုစွမ်းရည်ကို စမ်းသပ် လုပ်ဆောင်ခွင့် ပေးရပါမည်။ ကလေးတစ်ယောက်က တစ်စုံတစ်ယောက် စက်ဘီးစီးနေသည်ကို မြင်သောအခါ ထိုအရာသည် စံပြခြင်း အဆင့် ဖြစ်ပါသည်။

ကူညီခြင်း

ကူညီခြင်းပုံစံမှာ သင်ယူသူအား ထိုစွမ်းရည်ကို လေ့ကျင့်ခွင့် ပေးထားခြင်း ဖြစ်ပါသည်။ ဤအဆင့်သည် စံပြခြင်းအဆင့်ထက် ပိုကြာပါသည်။ အကြံပေး သင်ကြားသူဘက်မှ “လက်တွဲ ကိုင်ထားပေးခြင်း” လိုအပ်ပါသည်။ အကြံပေးသင်ကြားသူသည် လမ်းညွှန်ပေးရပြီး သင်ယူသူကို နည်းပြပေးရာတွင် တက်ကြွသော အခန်းကဏ္ဍမှ ပါဝင်ရပါသည်။ ဤအဆင့်သည် သင်ယူသူ အပြည့်အဝ ကျွမ်းကျင်တတ်မြောက်သွားသည်အထိ မကြာသင့်ဘဲ အခြေခံသဘောများကို နားလည်သွားသည်အထိသာ ကြာသင့်ပါသည်။ ဤအဆင့်ကို အလွန်ကြာအောင် ဆက်ထားမည်ဆိုပါက သင်ယူသူသည် အကြံပေးသင်ကြားသူအပေါ် မှီခိုတတ်လာပြီး အပြည့်အဝ ကျွမ်းကျင်မှုထိ မတိုးတက်တော့ပါ။ ကူညီခြင်း အဆင့်၏ အဆုံးကို သင်ယူသူက အခြားသူများအတွက် စတင် စံပြလာခြင်းဖြင့် မှတ်သားသင့်ပါသည်။ မိဘတစ်ဦးက ကလေးတစ်ဦး ဟန်ချက်ညီအောင် သင်ယူနေစဉ် စက်ဘီးကို ကိုင်ထားပေးနေသောအခါ ထိုအရာသည် ကူညီခြင်း အဆင့် ဖြစ်ပါသည်။

ကြည့်ရှုခြင်း

ကြည့်ရှုခြင်းသည် အကြာဆုံး အဆင့် ဖြစ်ပါသည်။ ၎င်းတွင် သင်ယူသူနှင့် ပိုမို သွယ်ဝိုက်သော ထိတွေ့မှု ပါဝင်ပါသည်။ ၎င်းသည် စွမ်းရည်တစ်ခု၏ အစိတ်အပိုင်းအားလုံး၌ အပြည့်အဝ ကျွမ်းကျင်နိုင်စွမ်းကို ဖွံ့ဖြိုးစေရန် ရည်ရွယ်ပါသည်။ ၎င်းသည် ပထမ အဆင့်နှစ်ခု ပေါင်းထားသော အချိန်ထက် ဆယ်ဆ သို့မဟုတ် ထို့ထက်ပို၍ ကြာနိုင်ပါသည်။ သင်ယူသူ၏ စွမ်းရည် တိုးတက်လာသည်နှင့်အမျှ အကြံပေးသင်ကြားသူနှင့် ထိတွေ့မှုသည် ပုံမှန်နည်းပါးလာကာ လိုအပ်သလိုသာ ဖြစ်လာနိုင်ပါသည်။ ဤအဆင့်တွင် သင်ယူသူသည် ထိုစွမ်းရည်ကို လုပ်ဆောင်ရာ၌ တာဝန်နှင့် အစပြုမှုကို တဖြည်းဖြည်း ပိုယူလာပါသည်။ တပည့်တော်မွေးထုတ်ခြင်းတွင် ပုံမှန်အားဖြင့် ဤအဆင့်၏ အဆုံးအမှတ်မှာ သင်ယူသူသည် မိမိ နည်းပြနေသော လူများမှတစ်ဆင့် စတုတ္ထမျိုးဆက်အထိ ထိုစွမ်းရည်ကို အောင်မြင်စွာ လက်ဆင့်ကမ်းပေးနိုင်သောအချိန် ဖြစ်ပါသည်။ မိဘတစ်ဦးက ကလေးတစ်ဦး စက်ဘီးစီးနေသည်ကို ကြည့်ရှုကာ သူ သို့မဟုတ် သူမသည် ကြီးကြပ်မှုမလိုဘဲ စီးနိုင်ရန် လုံလောက်သော စွမ်းရည်နှင့် အသိပညာ ရှိကြောင်း သေချာစေသောအခါ ထိုအရာသည် ကြည့်ရှုခြင်း အဆင့် ဖြစ်ပါသည်။

တာဝန်ပေးခြင်း

တာဝန်ပေးခြင်းပုံစံသည် သင်ယူသူက အကြံပေးသင်ကြားသူ၏ အသင်းဖော်အဆင့်သို့ ရောက်လာသောအခါ ဘွဲ့အပ်နှင်းသကဲ့သို့ အဆင့်တစ်ခု ဖြစ်ပါသည်။ သင်ယူသူနှင့် အကြံပေးသင်ကြားသူသည် တူညီသော ကွန်ရက်ထဲတွင် ရှိနေပါက ပုံမှန်မဟုတ်သော ဆက်သွယ်မှုနှင့် အသင်းဖော် အကြံပေးခြင်းများကို ဆက်လက် ပြုလုပ်နိုင်ပါသည်။ မိဘတစ်ဦးက ကလေးတစ်ဦးကို မည်သည့် ကြီးကြပ်မှုမျှ မရှိဘဲ စက်ဘီးစီးစေရန် လွှတ်ပေးသောအခါ ထိုအရာသည် တာဝန်ပေးခြင်း အဆင့် ဖြစ်ပါသည္။

တပည့်တော်တိုးတက်မှုကို ခြေရာခံရာတွင် ကွင်းဆက် သင်တန်းပေးခြင်းကို အသုံးပြုသည့် ဥပမာတစ်ခုအဖြစ် တပည့်တော်မွေးထုတ်ခြင်းအတွက် သင်တန်းနည်းပြ စစ်ဆေးမှုစာရင်းကိုလည်း ကြည့်ပါ။