S.O.A.P.S. သမ္မာကျမ်းစာ ဖတ်ရှုခြင်း

ယေရှုနောက်လိုက်သူတစ်ဦးအနေဖြင့် ကျွန်ုပ်တို့သည် သမ္မာကျမ်းစာကို နေ့စဉ် ဖတ်ရှုသင့်ပါသည်။ ကောင်းသော လမ်းညွှန်ချက်တစ်ခုမှာ တစ်ပတ်လျှင် သမ္မာကျမ်းစာ အခန်းအနည်းဆုံး ၂၅ မှ ၃၀ အထိ ဖတ်ရှုသွားရန် ဖြစ်ပါသည်။ S.O.A.P.S. သမ္မာကျမ်းစာ ဖတ်ရှုခြင်း ပုံစံကို အသုံးပြုကာ နေ့စဉ်မှတ်စု ရေးသားထားခြင်းသည် သင့်အား ပိုမို နားလည်စေခြင်း၊ နာခံစေခြင်းနှင့် ဝေငှစေခြင်းတို့ကို ကူညီပေးပါလိမ့်မည်။ S.O.A.P.S. ၏ အဓိပ္ပာယ်မှာ -

• ကျမ်းစာ : ယနေ့ သင့်အတွက် အထူး အဓိပ္ပာယ်ရှိသော ကျမ်းပိုဒ်တစ်ပိုဒ် သို့မဟုတ် တစ်ပိုဒ်ထက်ပိုသော ကျမ်းပိုဒ်များကို ရေးချပါ။
• လေ့လာသုံးသပ်ခြင်း : ပိုမို နားလည်နိုင်ရန် ထိုကျမ်းပိုဒ်များ သို့မဟုတ် အဓိကအချက်များကို သင့်ကိုယ်ပိုင် စကားလုံးများဖြင့် ပြန်ရေးပါ။
• လက်တွေ့ကျင့်သုံးခြင်း : ဤအမိန့်တော်များကို သင့်အသက်တာထဲတွင် နာခံခြင်းသည် ဘာကို ဆိုလိုသည်ကို စဉ်းစားပါ။
• ဆုတောင်းခြင်း : သင် သင်ယူခဲ့သောအရာနှင့် မည်သို့ နာခံသွားမည်ကို ဘုရားသခင်အား ပြောပြသော ဆုတောင်းချက်ကို ရေးချပါ။
• ဝေငှခြင်း : သင် သင်ယူခဲ့ပြီး လက်တွေ့ကျင့်သုံးခဲ့သောအရာကို ဘယ်သူနှင့် ဝေငှစေလိုသည်ကို ဘုရားသခင်အား မေးမြန်းပါ။

ဤသည်မှာ ယေရှုနောက်လိုက်သူတိုင်း အသုံးပြုနိုင်သော ထိရောက်သည့် သမ္မာကျမ်းစာလေ့လာနည်းတစ်ခုကို သင်ယူရန်နှင့် မှတ်မိစေရန် ရိုးရှင်းသော နည်းလမ်းတစ်ခု ဖြစ်ပါသည်။

S.O.A.P.S. လက်တွေ့လုပ်ဆောင်ပုံ ဥပမာ -

S – “ထာဝရဘုရား မိန့်တော်မူသည်ကား၊ ငါ၏ အကြံအစည်သည် သင်တို့၏ အကြံအစည်နှင့် မတူ။ ငါ၏ အကျင့်သည်လည်း သင်တို့၏ အကျင့်နှင့် မတူ။ မိုဃ်းကောင်းကင်သည် မြေကြီးထက် မြင့်သကဲ့သို့ ငါ၏ အကျင့်သည်လည်း သင်တို့၏ အကျင့်ထက် မြင့်၏။ ငါ၏ အကြံအစည်သည်လည်း သင်တို့၏ အကြံအစည်ထက် မြင့်၏။” ဟေရှာယ ၅၅:၈-၉

O – လူသားတစ်ဦးအနေဖြင့် ကျွန်ုပ် သိသည့်အရာနှင့် လုပ်ဆောင်တတ်သည့်အရာတို့တွင် ကန့်သတ်ချက်များ ရှိပါသည်။ ဘုရားသခင်မှာ မည်သည့်အရာတွင်မျှ ကန့်သတ်ချက် မရှိပါ။ ကိုယ်တော်သည် အရာအားလုံးကို မြင်တော်မူပြီး သိတော်မူပါသည်။ ကိုယ်တော်သည် မည်သည့်အရာမဆို ပြုလုပ်နိုင်ပါသည်။

A – ဘုရားသခင်သည် အရာအားလုံးကို သိတော်မူပြီး ကိုယ်တော်၏ နည်းလမ်းများက အကောင်းဆုံးဖြစ်သောကြောင့် ကျွန်ုပ်သည် ကိုယ်ပိုင်နည်းလမ်းများကိုသာ အားကိုးမည့်အစား ကိုယ်တော်နောက်သို့ လိုက်ပါက အသက်တာတွင် ပိုမို ကောင်းမွန်သော ရလဒ်များ ရရှိပါလိမ့်မည်။

P – သခင်ဘုရား၊ ကိုယ်တော်ကို နှစ်သက်စေပြီး အခြားသူများကို ကူညီသော ကောင်းသောအသက်တာကို မည်သို့ အသက်ရှင်ရမည်ကို ကျွန်ုပ် မသိပါ။ ကျွန်ုပ်၏ နည်းလမ်းများက အမှားများဆီသို့ ဦးတည်စေပါသည်။ ကျွန်ုပ်၏ အတွေးများကလည်း နာကျင်မှုကို ဖြစ်စေပါသည်။ ထို့အစား ကိုယ်တော်၏ နည်းလမ်းများနှင့် ကိုယ်တော်၏ အကြံအစည်များကို ကျွန်ုပ်အား သင်ကြားပေးတော်မူပါ။ ကိုယ်တော်နောက်သို့ ကျွန်ုပ် လိုက်လျှောက်စဉ် သန့်ရှင်းသော ဝိညာဉ်တော်က ကျွန်ုပ်ကို လမ်းပြပေးတော်မူပါ။

S – ဤကျမ်းပိုဒ်များနှင့် ဤလက်တွေ့ကျင့်သုံးချက်ကို ခက်ခဲသောအချိန်ကို ဖြတ်သန်းနေပြီး ရင်ဆိုင်နေရသော အရေးကြီးဆုံးဖြတ်ချက်များအတွက် လမ်းညွှန်မှုလိုအပ်နေသော ကျွန်ုပ်၏ မိတ်ဆွေ စတိဗ်ထံ ဝေငှပါမည်။