အသင်းတော်နှင့် တပည့်တော်၏ ရိုးရှင်းသော အနက်ဖွင့်ဆိုချက်

ခရစ်တော်အထဲ၌ ကျွန်ုပ်တို့သည် မည်သို့သောသူများ ဖြစ်သင့်သည်ကိုလည်းကောင်း၊ ခရစ်တော်အထဲ၌ အခြားသူများနှင့် မည်သို့ ဆက်သွယ်နေထိုင်သင့်သည်ကိုလည်းကောင်း သိရှိနိုင်ရန် “တပည့်တော်” နှင့် “အသင်းတော်” အတွက် ရိုးရှင်းသော အဓိပ္ပာယ်ဖွင့်ဆိုချက် ရှိထားခြင်းသည် အရေးကြီးပါသည်။

တပည့်တော်ဆိုတာ ဘာလဲ?

တပည့်တော် ဆိုသည့်စကားလုံး၏ အဓိပ္ပာယ်မှာ နောက်လိုက်ဟု ဆိုလိုပါသည်။ တပည့်တော်သည် ဘုရားသခင်၏ နောက်လိုက်ဖြစ်ပါသည်။ ယေရှုက “ကောင်းကင်နှင့် မြေကြီးပေါ်၌ ရှိသမျှသော အခွင့်အာဏာတိုင်းကို ငါ့အား ပေးအပ်ထားပြီ” ဟု မိန့်တော်မူခဲ့ပါသည်။ ထို့ကြောင့် ဘုရားသခင်၏ နိုင်ငံတော်တွင် ယေရှုသည် ကျွန်ုပ်တို့၏ ဘုရင်ဖြစ်ပါသည်။ ကျွန်ုပ်တို့သည် ကိုယ်တော်၏ နိုင်ငံသားများဖြစ်ပြီး ကိုယ်တော်၏ အလိုတော်အောက်၌ နေသောသူများ ဖြစ်ကြပါသည်။ ကိုယ်တော်၏ ဆန္ဒများ၊ ရည်ရွယ်ချက်များ၊ အကြံအစည်များ၊ ဦးစားပေးမှုများနှင့် တန်ဖိုးထားမှုများသည် အမြင့်ဆုံးနှင့် အကောင်းဆုံး ဖြစ်ပါသည်။ ကိုယ်တော်၏ နှုတ်ကပတ်တော်သည် ပညတ်တရား ဖြစ်ပါသည်။ ထိုနိုင်ငံတော်၏ ပညတ်တရားက ဘာလဲ? ယေရှုက ကိုယ်တော်၏ နိုင်ငံသားများကို ဘာလုပ်ရန် မိန့်တော်မူသနည်း။ ယေရှုက ဓမ္မဟောင်းကျမ်းထဲရှိ ဘုရားသခင်၏ ပညတ်တော်များ၊ အဘယ်ဆိုသော် ပညတ္တိကျမ်းနှင့် ပရောဖက်အပေါင်းတို့ကို ဤအချက်နှစ်ချက်ဖြင့် အနှစ်ချုပ်နိုင်သည်ဟု သွန်သင်တော်မူခဲ့ပါသည်။ ဘုရားသခင်ကို ချစ်လော့၊ လူများကို ချစ်လော့။ ယေရှုသည်လည်း ကျွန်ုပ်တို့ကို တပည့်တော်မွေးထုတ်ရန်နှင့် သူမိန့်မှာထားသမျှ အားလုံးကို နာခံစေရန် သူတို့ကို သွန်သင်ရန် အမိန့်ပေးခဲ့ပါသည်။ တပည့်တော်မွေးထုတ်ခြင်းတွင် ယေရှုမိန့်မှာထားသမျှ အားလုံးကို သွန်သင်ခြင်းပါဝင်သောကြောင့် ဓမ္မသစ်ကျမ်းကိုလည်း ဤအချက်တစ်ချက်ဖြင့် အနှစ်ချုပ်နိုင်ပါသည်။ တပည့်တော်မွေးထုတ်လော့။ ထို့ကြောင့် တပည့်တော်ဆိုသည်မှာ ဘုရားသခင်ကို ချစ်ပြီး၊ လူများကို ချစ်ကာ၊ တပည့်တော်မွေးထုတ်သော ယေရှု၏ နောက်လိုက်ဖြစ်ပါသည်။

အသင်းတော်ဆိုတာ ဘာလဲ?

အသင်းတော်ကို သင်သွားရသော နေရာတစ်ခု၊ အဆောက်အဦတစ်ခုအဖြစ် စဉ်းစားနေကျ ဖြစ်နိုင်ပါသည်။ သို့သော် ဘုရားသခင်၏ နှုတ်ကပတ်တော်တွင် အသင်းတော်ကို စုဝေးခြင်းတစ်ခု၊ သင်ပါဝင်သက်ဆိုင်သော လူစုတစ်စုအဖြစ် ဖော်ပြထားပါသည်။ “အသင်းတော်” ဆိုသော စကားလုံးကို သမ္မာကျမ်းစာတွင် မတူညီသော နည်းလမ်းသုံးမျိုးဖြင့် အသုံးပြုထားပါသည်။

• အလုံးစုံသော အသင်းတော် -- ယခင်ကရှိခဲ့သူများ၊ ယခုရှိနေသူများ၊ နောင်တွင် ရှိလာမည့် ယေရှုနောက်လိုက်သူအားလုံး
• မြို့ သို့မဟုတ် ဒေသဆိုင်ရာ အသင်းတော် -- ကမ္ဘာပေါ်ရှိ သတ်မှတ်ထားသော နေရာတစ်ခုအတွင်း သို့မဟုတ် အနီးပတ်ဝန်းကျင်တွင် နေထိုင်ပြီး ယေရှုနောက်လိုက်သော လူအားလုံး
• အိမ်အသင်းတော် -- ယေရှုနောက်လိုက်ပြီး သူတို့ထဲမှ တစ်ဦး သို့မဟုတ် တစ်ဦးထက်ပိုသောသူများ နေထိုင်သည့် နေရာတွင် တွေ့ဆုံစုဝေးသော လူအားလုံး

ရိုးရှင်းသော အသင်းတော်များသည် ယေရှုကို ၎င်းတို့၏ ဗဟိုချက်နှင့် ၎င်းတို့၏ ဘုရင်အဖြစ် ထားသော ဝိညာဉ်ရေး မိသားစုများ ဖြစ်ပါသည်။ ၎င်းတို့သည် ဘုရားသခင်ကို ချစ်ပြီး၊ အခြားသူများကို ချစ်ကာ၊ တပည့်တော်မွေးထုတ်သော ဝိညာဉ်ရေး မိသားစုများ ဖြစ်ပါသည်။ ထိုသို့သော ရိုးရှင်းသော အသင်းတော်အုပ်စုများ ပိုကြီးမားသော အမှုတစ်ခုကို အတူတကွ လုပ်ဆောင်ရန် ချိတ်ဆက်ကြသောအခါ ၎င်းတို့သည် မြို့ သို့မဟုတ် ဒေသဆိုင်ရာ အသင်းတော်တစ်ခုအဖြစ် ဖွဲ့စည်းနိုင်ပါသည်။ အလုံးစုံသော အသင်းတော်သည် ဒေသအသီးသီးအလိုက် ကွန်ရက်ဖြင့် ချိတ်ဆက်ထားသော ရိုးရှင်းသော အသင်းတော်အားလုံးဖြင့် ဖွဲ့စည်းထားပြီး သမိုင်းတစ်လျှောက်လုံးကို ဖြတ်သန်းလျက် ရှိပါသည်။