ຈິດວິນຍານທີ່ມີຊີວິດຢູ່ແມ່ນການໄດ້ຍິນ ແລະ ການເຊື່ອຟັງຕໍ່ພຣະເຈົ້າ

ຈິດວິນຍານທີ່ມີຊີວິດຢູ່ແມ່ນການໄດ້ຍິນ ແລະ ການເຊື່ອຟັງຕໍ່ພຣະເຈົ້າ ... ທັງມື້, ທຸກໆມື້.

ຫາຍໃຈເຂົ້າ

ໃນອານາຈັກ ພວກເຮົາຫາຍໃຈເຂົ້າເມື່ອພວກເຮົາໄດ້ຍິນຈາກພຣະເຈົ້າຜ່ານ:

• ພຣະຄຳຂອງພຣະອົງ - ພຣະຄຳພີ
• ການອະທິຖານ - ການສົນທະນາຂອງພວກເຮົາກັບພຣະອົງ
• ຮ່າງກາຍຂອງພຣະອົງ - ຄຣິສຕະຈັກ, ຜູ້ຕິດຕາມພຣະເຢຊູຄົນອື່ນໆ
• ການງານຂອງພຣະອົງ - ເຫດການ, ປະສົບການ ແລະ ບາງຄັ້ງແມ່ນການຂົ່ມເຫັງ ແລະ ຄວາມເຈັບປວດທີ່ພຣະອົງຊົງຍອມໃຫ້ລູກຂອງພຣະອົງຜ່ານໄປ

ຂ່າວດີສຳລັບຜູ້ຕິດຕາມພຣະເຢຊູທຸກຄົນກໍຄື ເມື່ອພວກເຮົາຫາຍໃຈເຂົ້າ ແລະ ໄດ້ຍິນຈາກພຣະເຈົ້າ ແລະ ເມື່ອພວກເຮົາຫາຍໃຈອອກ ແລະ ເຊື່ອຟັງສິ່ງທີ່ໄດ້ຍິນ ແລະ ແບ່ງປັນກັບຄົນອື່ນສິ່ງທີ່ພວກເຮົາໄດ້ຍິນ - ພຣະເຈົ້າຈະຊົງກ່າວຢ່າງຊັດເຈນຫຼາຍຂຶ້ນ.

ຫາຍໃຈອອກ

ໃນອານາຈັກ ພວກເຮົາຫາຍໃຈອອກເມື່ອພວກເຮົາລົງມືເຮັດຕາມສິ່ງທີ່ພວກເຮົາໄດ້ຍິນຈາກພຣະເຈົ້າ. ພວກເຮົາຫາຍໃຈອອກເມື່ອພວກເຮົາເຊື່ອຟັງ. ບາງຄັ້ງການຫາຍໃຈອອກເພື່ອເຊື່ອຟັງໝາຍເຖິງການປ່ຽນຄວາມຄິດ, ຄຳເວົ້າ ຫຼື ການກະທຳຂອງພວກເຮົາ ເພື່ອໃຫ້ສອດຄ່ອງກັບພຣະເຢຊູ ແລະ ນ້ຳພຣະໄທຂອງພຣະອົງ. ບາງຄັ້ງການຫາຍໃຈອອກເພື່ອເຊື່ອຟັງໝາຍເຖິງການແບ່ງປັນສິ່ງທີ່ພຣະເຢຊູໄດ້ແບ່ງປັນກັບພວກເຮົາ - ມອບສິ່ງທີ່ພຣະອົງໄດ້ມອບໃຫ້ພວກເຮົາ - ເພື່ອໃຫ້ຄົນອື່ນໄດ້ຮັບພຣະພອນເໝືອນກັນກັບທີ່ພຣະເຈົ້າກຳລັງອວຍພອນພວກເຮົາ. ສຳລັບຜູ້ຕິດຕາມພຣະເຢຊູ - ການຫາຍໃຈເຂົ້າ ແລະ ການຫາຍໃຈອອກນີ້ສຳຄັນຫຼາຍ. ມັນເປັນຊີວິດຂອງພວກເຮົາແທ້ໆ.