ສາວົກລູກເປັດ - ການນຳໃນທັນທີ

ທ່ານຮູ້ບໍວ່າລູກເປັດກ່ຽວຫຍັງກັບການສ້າງສາວົກ? ທ່ານເຄີຍເຫັນລູກເປັດກຸ່ມໜຶ່ງອອກໄປຍ່າງບໍ? ລູກເປັດຊ່ວຍອະທິບາຍຫຼັກການສຳຄັນກ່ຽວກັບການສ້າງສາວົກໄດ້ຢ່າງແທ້ຈິງ. ຖ້າທ່ານຢາກເຫັນຄອບຄົວຂອງພຣະເຈົ້າເຕີບໃຫຍ່ໄປໄກ ແລະ ເຕີບໃຫຍ່ໃນຄວາມສັດຊື່, ກໍໃຫ້ຄິດເຖິງການສ້າງສາວົກເໝືອນກັບລູກເປັດ - ເປັນຜູ້ຕິດຕາມ ແລະ ເປັນຜູ້ນຳໃນເວລາດຽວກັນ.

ບໍ່ວ່າທ່ານຈະຢູ່ບ່ອນໃດໃນໂລກ, ພາບນີ້ກໍເບິ່ງຄືກັນສະເໝີ.

ເປັດແມ່ນຳພາ ແລະ ລູກເປັດຂອງມັນກໍຕິດຕາມ - ທີລະຕົວ - ຕໍ່ແຖວກັນໄປ. ເປັດແມ່ນຳພາ. ລູກເປັດນ້ອຍໆຕິດຕາມ. ແຕ່ຖ້າທ່ານເບິ່ງໃຫ້ໃກ້ກວ່ານັ້ນ, ທ່ານຈະເຫັນວ່າຍັງມີອີກສິ່ງໜຶ່ງກຳລັງເກີດຂຶ້ນເຊັ່ນກັນ. ລູກເປັດນ້ອຍໆແຕ່ລະຕົວກຳລັງຮັບບົດບາດສອງຢ່າງຢູ່ໃນເວລາດຽວກັນ:

• ລູກເປັດນ້ອຍໆແຕ່ລະຕົວເປັນ ຜູ້ຕິດຕາມ, ເພາະມັນກຳລັງຕິດຕາມເປັດແມ່ ຫຼື ລູກເປັດອີກຕົວໜຶ່ງທີ່ກຳລັງຍ່າງຢູ່ຂ້າງໜ້າມັນ.
• ແລະ ໃນເວລາດຽວກັນນັ້ນເອງ, ລູກເປັດນ້ອຍໆແຕ່ລະຕົວກໍເປັນ ຜູ້ນຳ, ເພາະມັນກຳລັງນຳລູກເປັດຕົວທີ່ຍ່າງຢູ່ຂ້າງຫຼັງມັນ.

ດັ່ງນັ້ນ ລູກເປັດເປັນ ຜູ້ຕິດຕາມ ຫຼື ຜູ້ນຳ? ມັນເປັນທັງສອງຢ່າງ.

ນັ້ນແຫຼະຈຶ່ງເປັນເຫດຜົນທີ່ເປັດທີ່ “ອອກໄປຍ່າງ” ກ່ຽວຂ້ອງທຸກຢ່າງກັບການສ້າງສາວົກ. ພຣະເຈົ້າຕ້ອງການໃຫ້ຄອບຄົວຂອງພຣະອົງເຕີບໃຫຍ່ໄປໄກ - ແລະ ດັ່ງນັ້ນ ພຣະອົງຈຶ່ງຄາດຫວັງໃຫ້ຜູ້ຕິດຕາມທຸກຄົນເປັນຜູ້ນຳ, ຜູ້ເຊື່ອທຸກຄົນເປັນຜູ້ແບ່ງປັນ, ແລະ ສາວົກທຸກຄົນເປັນຜູ້ສ້າງສາວົກ - ໃນເວລາດຽວກັນ.

ໜຶ່ງໃນກັບດັກທີ່ພວກເຮົາຕົກລົງໄປ, ໃນຖານະສາວົກ ແລະ ຜູ້ສ້າງສາວົກ, ແມ່ນຄວາມເຊື່ອທີ່ບໍ່ເປັນຈິງວ່າພວກເຮົາຈະຕ້ອງຮູ້ທຸກຢ່າງ ຫຼື ຢ່າງນ້ອຍກໍຕ້ອງຮູ້ຫຼາຍສິ່ງ ກ່ອນທີ່ຈະແບ່ງປັນຫຍັງສັກຢ່າງ. ແຕ່ນັ້ນບໍ່ແມ່ນວິທີທີ່ການເປັນສາວົກທຳງານ. ສາວົກກໍເໝືອນກັບລູກເປັດ. ເພື່ອເປັນຜູ້ນຳ, ພວກເຂົາບໍ່ຈຳເປັນຕ້ອງຮູ້ທຸກຢ່າງ.

ພວກເຂົາພຽງແຕ່ຕ້ອງຢູ່ຂ້າງໜ້າພຽງໜຶ່ງກ້າວເທົ່ານັ້ນ. ພຣະເຈົ້າຕ້ອງການໃຫ້ຄອບຄົວຂອງພຣະອົງເຕີບໃຫຍ່ໃນຄວາມສັດຊື່ - ແລະ ດັ່ງນັ້ນ ພຣະອົງຈຶ່ງຄາດຫວັງໃຫ້ຜູ້ນຳທຸກຄົນເປັນຜູ້ຕິດຕາມ, ຜູ້ແບ່ງປັນທຸກຄົນເປັນຜູ້ເຊື່ອ, ແລະ ຜູ້ສ້າງສາວົກທຸກຄົນເປັນສາວົກ - ໃນເວລາດຽວກັນເຊັ່ນກັນ. ອີກໜຶ່ງກັບດັກທີ່ພວກເຮົາຕົກລົງໄປ, ໃນຖານະສາວົກ ແລະ ຜູ້ສ້າງສາວົກ, ແມ່ນຄວາມເຊື່ອທີ່ບໍ່ເປັນຈິງວ່າມີບາງຄົນຢູ່ບາງບ່ອນທີ່ຮູ້ທຸກຢ່າງ ແລະ ຖ້າພວກເຮົາພຽງແຕ່ຫາເຂົາເຈົ້າໃຫ້ເຈີ ແລະ ຕິດຕາມພວກເຂົາ, ພວກເຮົາກໍຈະພ້ອມ. ແຕ່ນັ້ນກໍບໍ່ແມ່ນວິທີທີ່ການເປັນສາວົກທຳງານເຊັ່ນກັນ.

ໃນອານາຈັກຂອງພຣະເຈົ້າ, ມີພຽງ “ເປັດແມ່” ຕົວດຽວທີ່ພວກເຮົາທຸກຄົນຕິດຕາມ -- ແລະ ນັ້ນກໍຄືພຣະເຢຊູຄຣິດ. ບໍ່ແມ່ນຜູ້ສອນສາສະໜາ. ບໍ່ແມ່ນອາຈານ. ບໍ່ແມ່ນອາຈານໂຮງຮຽນພຣະຄຳພີ. ມີພຽງພຣະເຢຊູເທົ່ານັ້ນທີ່ສົມຄວນໄດ້ຮັບຄວາມເຊື່ອທັງໝົດຂອງພວກເຮົາ.

ພວກເຮົາທີ່ເຫຼືອກຳລັງຢູ່ໃນຂະບວນການ. ຈະມີບາງຄົນທີ່ຢູ່ໃກ້ພຣະເຢຊູຫຼາຍກວ່າພວກເຮົາໃຫ້ພວກເຮົາຕິດຕາມຢູ່ສະເໝີ. ແລະ ຈະມີບາງຄົນທີ່ຢູ່ຫ່າງກວ່າພວກເຮົາໃຫ້ພວກເຮົານຳພາຢູ່ສະເໝີ. ແຕ່ບໍ່ວ່າພວກເຮົາຈະຢູ່ຈຸດໃດ, ສາຍຕາ - ແລະ ຫົວໃຈ - ຂອງພວກເຮົາຄວນຈະຈົດຈໍ່ຢູ່ທີ່ພຣະເຢຊູສະເໝີ.

ໃນພຣະຄຳພີ, ໂປໂລ, ຜູ້ທີ່ຂຽນພຣະຄຳພີພັນທະສັນຍາໃໝ່ຈຳນວນຫຼາຍ ແລະ ເລີ່ມຄຣິສຕະຈັກແຫ່ງທຳອິດຫຼາຍແຫ່ງ, ບໍ່ໄດ້ຂຽນພຽງວ່າ - “ຈົ່ງຕິດຕາມຂ້ອຍ.” ລາວຂຽນວ່າ, “ຈົ່ງຕິດຕາມຂ້ອຍ ເໝືອນກັບທີ່ຂ້ອຍຕິດຕາມພຣະຄຣິດ.” ໂປໂລຮູ້ສິ່ງທີ່ລູກເປັດທົ່ວທຸກບ່ອນຮູ້ ແລະ ສິ່ງທີ່ສາວົກທຸກຄົນຄວນຮູ້ເຊັ່ນກັນ - ຜູ້ນຳທຸກຄົນໃນອານາຈັກຂອງພຣະເຈົ້າຈະຕ້ອງເປັນຜູ້ຕິດຕາມ - ແລະ ພວກເຮົາທຸກຄົນຕິດຕາມພຣະເຢຊູ.

ໃນພຣະຄຳພີ, ໂປໂລຍັງຂຽນອີກວ່າ: “ສິ່ງທີ່ເຈົ້າໄດ້ຍິນຈາກຂ້ອຍ… ຈົ່ງແບ່ງປັນໃຫ້ແກ່ຄົນທີ່ສັດຊື່ ຜູ້ທີ່ຈະສາມາດສອນຄົນອື່ນໄດ້ເຊັ່ນກັນ.” ໂປໂລຮູ້ສິ່ງທີ່ລູກເປັດທົ່ວທຸກບ່ອນຮູ້ ແລະ ສິ່ງທີ່ສາວົກທຸກຄົນຄວນຮູ້ເຊັ່ນກັນ. ຜູ້ຕິດຕາມທຸກຄົນໃນອານາຈັກຂອງພຣະເຈົ້າຈະຕ້ອງເປັນຜູ້ນຳ - ແລະ ພວກເຮົາທຸກຄົນຄວນນຳພາເໝືອນກັບພຣະເຢຊູ, ຍອມສະຫຼະຊີວິດຂອງພວກເຮົາເພື່ອຄົນອື່ນ. ຖ້າທ່ານຢາກເຫັນຄອບຄົວຂອງພຣະເຈົ້າເຕີບໃຫຍ່ໄປໄກ ແລະ ເຕີບໃຫຍ່ໃນຄວາມສັດຊື່, ກໍໃຫ້ຄິດເຖິງການສ້າງສາວົກເໝືອນກັບລູກເປັດ - ເປັນຜູ້ຕິດຕາມ ແລະ ເປັນຜູ້ນຳໃນເວລາດຽວກັນ.