Ufafanuzi rahisi wa Mwanafunzi na Kanisa

Ni muhimu kuwa na ufafanuzi rahisi wa "mwanafunzi" na "kanisa", ili tujue tunapaswa kuwa nani ndani ya Kristo na jinsi tunavyopaswa kuhusiana na wengine ndani ya Kristo.

Mwanafunzi ni nani?

Maana ya neno mwanafunzi ni mfuasi. Mwanafunzi ni mfuasi wa Mungu. Yesu alisema, "Nimepewa mamlaka yote mbinguni na duniani." Kwa hiyo katika Ufalme wa Mungu, Yesu ndiye Mfalme wetu. Sisi ni raia Wake, walio chini ya mapenzi Yake. Tamaa, makusudi, nia, vipaumbele na maadili Yake ndiyo yaliyo ya juu na bora zaidi. Neno Lake ndilo sheria. Je, sheria ya ufalme ni nini? Yesu anawaambia raia Wake wafanye nini? Yesu alifundisha kwamba amri za Mungu kutoka Agano la Kale, yaani sheria yote na manabii, zinaweza kufupishwa katika mambo haya mawili: Mpende Mungu na Uwapende Watu. Yesu pia alituamuru kufanya wanafunzi na kuwafundisha kutii yote aliyoyaamuru. Kwa kuwa kufanya wanafunzi kunajumuisha kuwafundisha yote ambayo Yesu aliamuru, Agano Jipya linaweza kufupishwa katika jambo hili moja: Fanya Wanafunzi. Kwa hiyo, mwanafunzi ni mfuasi wa Yesu anayempenda Mungu, anayewapenda watu, na anayefanya wanafunzi.

Kanisa ni nini?

Huenda umezoea kufikiria kanisa kama jengo - mahali unapokwenda. Lakini Neno la Mungu hulizungumzia kanisa kama kusanyiko - watu ambao wewe ni sehemu yao. Neno "kanisa" linatumika katika Biblia kwa njia tatu tofauti:

• kanisa la ulimwengu wote -- watu wote ambao walikuwa, walio, na watakaowahi kuwa wafuasi wa Yesu
• kanisa la mji au la eneo -- watu wote wanaomfuata Yesu na wanaoishi ndani au karibu na eneo fulani la dunia
• kanisa la nyumbani -- watu wote wanaomfuata Yesu na kukutana mahali ambapo mmoja au zaidi wao wanaishi

Makanisa rahisi ni familia za kiroho ambazo Yesu ndiye kitovu chao na Mfalme wao. Ni familia za kiroho zinazompenda Mungu, zinazowapenda wengine, na zinazofanya wanafunzi. Vikundi vya makanisa haya rahisi vinapoungana kufanya jambo kubwa zaidi pamoja, vinaweza kuunda kanisa la mji au la eneo. Kanisa la ulimwengu wote linaundwa na makanisa yote rahisi yaliyofungamanishwa pamoja katika maeneo mbalimbali na kuvuka historia yote.