3 Circles Ihinrere Igbejade

Ọ̀pọ̀ ọ̀nà ló wà láti pín Ìtàn Ọlọ́run.

Ọ̀nà tí ó dára jù lọ yóò sinmi lórí ẹni tí o bá ń pín pẹ̀lú, ọ̀nà tí wọ́n fi ń wo ayé, àti àwọn ìrírí ìgbésí ayé wọn. Ọlọ́run máa ń lo ọkàn tí ó ṣetan láti pín láti ṣiṣẹ́ nínú ọkàn tí ó ṣetan láti gbọ́. Iṣẹ́ Rẹ̀ ni. Ó kan ń pè wá láti kópa nínú rẹ̀.

Ọ̀nà kan láti pín Ìtàn Ọlọ́run ni nípa pínpín àti ṣàlàyé àwòrán rọrùn kan tí a ń pè ní 3 Circles.

Gbogbo wa ń gbé nínú ayé tí ó ti bàjẹ́ gidigidi.

A máa ń rí, a sì máa ń gbọ́ ìtàn ìjìyà, ikú, ogun, àìsàn, àti ìfẹ́kúfẹ̀ẹ́ tó ń di ènìyàn mọ́lẹ̀. Ó wà níbi gbogbo. Ṣùgbọ́n èyí kì í ṣe Ìṣètò Pípé Ọlọ́run láti ìbẹ̀rẹ̀.

Ìṣètò Pípé Ọlọ́run ni ayé tí ó kún fún ìfẹ́, ayọ̀, ìṣọ̀kan, àti àlàáfíà.

Ọ̀nà tí a fi yọ ara wa kúrò nínú Ìṣètò Pípé Ọlọ́run tí a sì wọ inú ìbàjẹ́ ni nípasẹ̀ ohun tí Bíbélì ń pè ní “ẹ̀ṣẹ̀.”

Ẹ̀ṣẹ̀ ni yíyí kúrò ní ọ̀nà Ọlọ́run àti lílépa ọ̀nà tiwa. Ẹ̀ṣẹ̀ yà wá kúrò lọ́dọ̀ Ọlọ́run. Ẹ̀ṣẹ̀ sọ wá sínú ìbàjẹ́. Ẹ̀ṣẹ̀ sì ń darí wa sí ikú tẹ̀mí.

Àwọn ènìyàn fẹ́ bọ kúrò nínú ìbàjẹ́. A máa ń gbìyànjú onírúurú ọ̀nà láti bọ kúrò níbẹ̀. Díẹ̀ nínú wa máa ń gbìyànjú oògùn olóró àti ọtí. Díẹ̀ nínú wa máa ń ro pé iṣẹ́ rere tàbí kíkójọ owó púpọ̀ yóò mú wa bọ kúrò níbẹ̀. Díẹ̀ nínú wa máa ń ro pé ìbáṣepọ̀ kan yóò yọ wa kúrò níbẹ̀. Kódà, àwọn míì máa ń gbìyànjú ẹ̀sìn - a ro pé ìwà rere tàbí ríràn àwọn mìíràn lọ́wọ́ yóò sọ wá di òmìnira.

Kò sí ọ̀kan nínú àwọn nǹkan wọ̀nyí tó lè yanjú ìṣòro ìbàjẹ́ náà ní tòótọ́. Kódà bí ó tilẹ̀ jẹ́ pé ó dà bí ẹni pé a ti bọ kúrò níbẹ̀ fún ìṣẹ́jú kan, a tún máa ń padà sí ibi tá a ti bẹ̀rẹ̀. Òtítọ́ tó le yìí ni pé, tí a bá ṣì wà nínú ìbàjẹ́ nígbà tí ìgbésí ayé yìí bá parí, Bíbélì sọ pé a yóò yà kúrò lọ́dọ̀ Ọlọ́run títí láé.

Bíbélì ń pè ibi yẹn ní “Apadi.”

Ṣùgbọ́n Ọlọ́run kò fẹ́ kí a dúró nínú ìbàjẹ́.

Bíbélì sọ pé Ọlọ́run fẹ́ràn wa tó bẹ́ẹ̀ gẹ́ẹ́ tí Ó fi rán Ọmọ Rẹ̀ kan ṣoṣo wá láti ṣe ọ̀nà àbájáde fún wa. Jésù wá sí ayé láti yọ ẹ̀ṣẹ̀ wa kúrò, kí Ó sì mú wa jáde kúrò nínú ìbàjẹ́.

Nítorí náà, Jésù, Ọmọ Ọlọ́run, fi ikú Rẹ̀ san gbèsè ẹ̀ṣẹ̀ wa.

Ọjọ́ mẹ́ta lẹ́yìn tí Jésù kú, tí wọ́n sì sin ín, Ó jíǹde kúrò nínú òkú. Nítorí ẹbọ ńlá Rẹ̀, Ọlọ́run fi Jésù jẹ́ Ọba ohun gbogbo ní ọ̀run àti lórí ilẹ̀ ayé.

Ọba Jésù ṣe ọ̀nà àbájáde kúrò nínú ìbàjẹ́ fún wa. Ọlọ́run sọ pé bí...

...a bá YÍ PADÀ kúrò nínú ẹ̀ṣẹ̀ wa...

...a sì GBÀGBỌ́ pé Jésù kú fún wa...

...a sì ṢE ÌRÌBỌMI ní orúkọ Baba, Ọmọ, àti Ẹ̀mí Mímọ́...

Nígbà náà Ọlọ́run máa jí wa dìde, gẹ́gẹ́ bí Jésù, kí a lè rìn nínú ìgbésí ayé tuntun gẹ́gẹ́ bí apá kan nínú ìdílé Ọlọ́run títí láé.

Lẹ́yìn náà, a máa ń fi ìgbésí ayé tuntun yìí hàn nínú ayé tí ó ti bàjẹ́, a sì ń dúró de ipadà Jésù nígbà tí yóò dá Ọ̀run Tuntun àti Ayé Tuntun sílẹ̀, níbi tí a óò ti wà pẹ̀lú Rẹ̀ títí láé nínú ìpípé pátápátá.

Ọlọ́run fẹ́ kí a DÀGBÀ nínú ìbáṣepọ̀ wa pẹ̀lú Rẹ̀. Ọlọ́run fẹ́ kí a TÚN PADÀ sínú Ìṣètò Pípé Rẹ̀ tí Ó pinnu láti ìbẹ̀rẹ̀.

Gẹ́gẹ́ bí apá kan nínú ìdílé Ọlọ́run, Jésù fún wa ní ìpínṣẹ́ kan - ìdí kan fún ìgbésí ayé - àti ọ̀nà láti gbé ìgbésí ayé tó dára jù lọ.

Ìpínṣẹ́ Jésù fún wa ni pé kí a LỌ.

Jésù rán wa padà sínú ìbàjẹ́, gẹ́gẹ́ bí Baba Rẹ̀ Ọlọ́run ṣe rán an wá, láti ran àwọn mìíràn lọ́wọ́ láti bọ kúrò níbẹ̀ kí wọ́n sì di apá kan nínú ìdílé Ọlọ́run títí láé pẹ̀lú.

Nínú àwòrán 3 Circles yìí, irú ènìyàn méjì péré ló wà -

Àwọn tí wọ́n jẹ́ apá kan nínú Ìṣètò Pípé Ọlọ́run, tí wọ́n sì ń gbé ìpínṣẹ́ ìgbàlà Ọlọ́run jáde, tí wọ́n ń ràn àwọn mìíràn lọ́wọ́ láti tún so wọ́n pọ̀ mọ́ Ọlọ́run àti ìdílé Rẹ̀ títí láé.

Tàbí...

Àwọn tí wọ́n ṣì wà nínú ìbàjẹ́, tí wọ́n ń gbìyànjú ohun gbogbo láti bọ kúrò níbẹ̀, tí wọ́n sì ń retí pé ẹnikan yóò gbà wọ́n là.

• Ṣé o mọ ibi tí o wà báyìí?
• Ṣé o mọ ibi tí o fẹ́ wà?

Ọ̀pọ̀ ọ̀nà ló wà láti pín Ìtàn Ọlọ́run. Ohun pàtàkì ni pé kí o pín un. Ọlọ́run máa ń lo ọkàn tí ó ṣetan láti pín láti ṣiṣẹ́ nínú ọkàn tí ó ṣetan láti gbọ́. Iṣẹ́ Rẹ̀ ni. Ó kan ń pè wá láti kópa nínú rẹ̀.