Bishara da Yadda ake Rarraba shi

Akwai hanyoyi da yawa na raba Labarin Allah. Hanya mafi dacewa za ta dogara ne da mutumin da kake rabawa da yadda yake kallon duniya da abubuwan da ya fuskanta a rayuwa. Allah yana amfani da zukatan da suke shirye su raba domin ya yi aiki a zukatan da suke shirye su ji. Hanya guda ɗaya ta raba Bisharar Allah ita ce ta faɗin Labarin Allah tun daga halitta har zuwa hukunci - daga farkon 'yan adam har zuwa ƙarshen wannan zamani.

Labarin Allah: Daga Halitta zuwa Hukunci

Tun farko, Allah ya halicci dukan duniya da dukan abin da ke cikinta.

Ya halicci MUTUM NA FARKO da MACE TA FARKO. Ya sa su a cikin lambu mai kyau. Ya mai da su SASHE NA IYALINSA kuma yana da KUSANCI TA MUSAMMAN da su.

Ya halicce su domin su RAYU HAR ABADA. Babu mutuwa a lokacin. Amma ko a wannan wuri cikakke, mutum ya tayar wa Allah ya kawo ZUNUBI da WAHALA cikin duniya. Allah ya KORA mutum daga lambun. Dangantakar da ke tsakanin mutum da Allah ta LALACE. Yanzu mutum zai fuskanci MUTUWA. A cikin daruruwan shekaru masu yawa, Allah ya ci gaba da aiko da MANZANNI zuwa duniya. Sun tunatar da mutum game da zunubinsa, amma sun kuma gaya masa game da AMINCIN Allah da ALKAWARINSA na aiko da MAI CETO zuwa duniya.

Mai Ceton zai MAYAR da kusanciyar dangantaka tsakanin Allah da mutum. Mai Ceton zai CECI mutum daga mutuwa. Mai Ceton zai ba da RAYUWA MADAWWAMIYA kuma ya kasance tare da mutum har abada. Allah yana ƙaunarmu sosai, saboda haka sa’ad da lokaci ya yi, ya aiko Ɗansa zuwa duniya domin ya zama wannan Mai Ceto.

Yesu Ɗan Allah ne. An haife shi cikin duniya ta wurin budurwa. Ya yi rayuwa cikakkiya. Bai taɓa yin zunubi ba. Yesu ya koya wa mutane game da Allah. Ya yi mu’ujizai da yawa yana nuna ikonsa mai girma. Ya fitar da aljanu da yawa. Ya warkar da mutane da yawa. Ya sa makafi suka gani. Ya sa kurame suka ji. Ya sa guragu suka yi tafiya. Har ma Yesu ya ta da matattu. Shugabannin addini da yawa sun ji TSORO da KISHIN Yesu.

Sun so a kashe Shi. Tun da bai taɓa yin zunubi ba, Yesu bai wajaba ya mutu ba.

Amma ya ZAƁI ya mutu a matsayin HADAYA dominmu duka. Mutuwarsa mai zafi ta rufe zunuban 'yan adam. Bayan haka aka binne Yesu a kabari. Allah ya ga HADAYAR da Yesu ya yi kuma ya karɓe ta. Allah ya nuna cewa ya karɓe ta ta wurin ta da Yesu daga matattu a rana ta uku.

Allah ya ce idan muka YI IMANI kuma muka KARƁI hadayar Yesu saboda zunubanmu -- idan muka JUYA DAGA zunubanmu muka kuma BI Yesu, Allah yana TSARKAKE mu daga dukan zunubi kuma yana MARABA da mu mu koma cikin iyalinsa.

Allah yana aiko da RUHU MAI TSARKI ya zauna a cikinmu kuma ya sa mu iya bin Yesu. Ana yi mana BAFTISMA cikin ruwa domin nuna da kuma tabbatar da wannan dangantaka da aka maido.

A matsayin alamar mutuwa, ana binne mu a ƙarƙashin ruwa. A matsayin alamar sabuwar rayuwa, ana tashe mu daga ruwa domin mu bi Yesu.

Sa’ad da Yesu ya tashi daga matattu, ya yi kwana 40 a duniya.

Yesu ya koya wa mabiyansa su je ko’ina su gaya wa kowa a duniya bisharar cetonsa. Yesu ya ce - Ku je ku ALMAJIRTAR DA dukan al’ummai, kuna yi musu BAFTISMA da sunan Uba, da Ɗa, da Ruhu Mai Tsarki; kuma kuna KOYA musu su yi biyayya ga duk abin da na umarce ku. Kuma zan kasance tare da ku kullum - har zuwa ƙarshen wannan zamani.

Bayan haka aka ƊAUKI Yesu sama a gabansu zuwa sama. Wata rana, Yesu zai SAKE ZUWA kamar yadda ya tafi. Zai HUKUNTA HAR ABADA waɗanda ba su ƙaunace shi ba kuma ba su yi masa biyayya ba. Zai KARƁA kuma ya SAKA WA HAR ABADA waɗanda suka ƙaunace shi kuma suka yi masa biyayya. Za mu RAYU HAR ABADA tare da Shi a cikin Sabuwar Sama da Sabuwar Ƙasa.

Na YI IMANI kuma na KARƁI hadayar da Yesu ya yi saboda zunubaina. Ya tsarkake ni kuma ya mai da ni sashe na iyalin Allah. Yana ƙaunata, ni kuma ina ƙaunarsa kuma zan rayu tare da shi har abada a Mulkinsa. Allah yana ƙaunarka kuma yana so ka karɓi wannan baiwa kai ma. Kana so ka yi haka yanzu?

Ka yi atisaye na wannan gabatarwar bishara kai kaɗai har sai ka ji daɗin bayar da labarin.