Matsaloli da yawa

Sauri yana da muhimmanci domin inda dukkanmu za mu yi madawwamin zamanmu ana ƙayyade shi ne a cikin ɗan gajeren lokacin nan da muke kira “rayuwa”. Maganar Allah tana gaya mana cewa Allah mai haƙuri ne da mu - ba ya son kowa ya halaka, sai dai kowa ya tuba ya bi shi. Allah yana ba mu ƙarin lokaci domin ya san muna da ɗan gajeren lokaci kaɗai don mu yi duk abin da ya kira mu mu yi kuma mu kai ga duk mutanen da yake so mu kai musu. Domin mu bi Yesu sosai, dole ne mu gaggauta kaiwa ga mutanensa. Ba za mu iya ja ƙafa kawai ba. Dole ne mu ƙara saurinmu.

Ko da yake Ikilisiya ta fi girma kuma kason ta cikin yawan jama'ar duniya ya fi na kowane lokaci a baya, har yanzu ba mu iya tafiya daidai da saurin ƙaruwa na yawan jama'a ba. Wannan yana nufin a yau akwai mutane da suka ɓace fiye da kowane lokaci a baya. Wannan yanayin da ake ciki ba abin yarda ba ne. Wannan yana ɗaya daga cikin dalilan da ya sa yin almajirai masu ninkawa yake da muhimmanci sosai.

Kason almajiran da a zahiri suke ninkawa akai-akai yana da matuƙar muhimmanci. Don bayyana haka, bari mu duba misali na tsawon shekaru goma.

A ce kun fara da almajiri ɗaya wanda yake ninka sabon almajiri sau ɗaya a kowane watanni 18. Sababbin almajiran kuma su ma suna yin haka. A cikin shekaru goma, za ku sami almajirai 64.

Amma idan maimakon haka, wannan almajiri ɗaya da sababbin almajiran suna ninkawa a kowane watanni 4, to a cikin shekaru goma za ku sami sama da biliyan ɗaya na almajirai. Wato, a cikin shekaru goma, sauya matsakaicin saurin ninkawa daga watanni 18 zuwa watanni 4 ba yana nufin sakamakon ya fi sauri sau huɗu da rabi ba. A'a, ya fi sauri fiye da sau miliyan 15.

Wannan yana yiwuwa ne domin abu na farko da sabon almajiri ya kamata ya yi shi ne ya raba da wasu abin da yake koya. Wannan yana nufin za su iya jagorantar wani zuwa ga Almasihu nan da nan bayan sun zo ga bangaskiya. Wannan tsarin na iya ci gaba a duk tsawon balagar almajirai idan almajiran suka ci gaba da tsarin da mutane biyu ke riƙe juna da alhaki wajen yin biyayya da kuma raba abin da suke koya.