Baftisma da Yadda ake yi

Baftisma hoto ne na sabuwar rayuwarmu, mun jiku da siffar Yesu, an canza mu cikin biyayya ga Allah. Hoto ne na mutuwarmu ga zunubi, kamar yadda Yesu ya mutu domin zunubanmu. Hoto ne na binne tsohuwar rayuwarmu, kamar yadda aka binne Yesu. Hoto ne na sake haihuwa zuwa sabuwar rayuwa cikin Almasihu, kamar yadda aka ta da Yesu kuma yana raye a yau. Yesu ya ce -- “Ku tafi, ku almajirtar da dukan al’ummai, kuna yi musu baftisma cikin sunan Uba, da Ɗa, da na Ruhu Mai Tsarki...” Baftisma - ko Baptizo a asalin harshen Girka - yana nufin jiƙewa ko nutsarwa - kamar lokacin da ka rina ƙyalle, ya sha launin sosai kuma ya fito a canza.

Yadda Ake Yi wa Wani Baftisma

Idan ba ka taɓa yi wa wani baftisma ba a dā, zai iya zama abin tsoro a gare ka, amma bai kamata ya zama haka ba. Ga wasu matakai masu sauƙi:

• Samo wani wurin ruwa mai isasshen zurfi domin sabon almajirin ya nutsu cikinsa gaba ɗaya. Wannan na iya zama tafki, kogi, lake ko teku. Haka kuma yana iya zama baho ko wata hanya dabam ta tara ruwa.
• Ka bar almajirin ya riƙe ɗaya daga cikin hannuwanka da hannunsa, sannan ka goyi bayansa da ɗayan hannun.
• Ka yi tambayoyi biyu irin waɗannan domin ka tabbata ya fahimci shawarar da ya yanke. “Ka karɓi Yesu Almasihu a matsayin Ubangijinka da Mai Cetonka?” “Za ka yi masa biyayya ka kuma bauta masa a matsayin Sarkinka har sauran rayuwarka?”
• Idan ya amsa “I”, ga duka biyun, sai ka faɗi wani abu kamar haka: “Saboda ka furta bangaskiyarka ga Ubangiji Yesu, yanzu ina yi maka baftisma cikin sunan Uba, da Ɗa, da Ruhu Mai Tsarki.”
• Ka taimaka masa ya sauka cikin ruwa, ya nutse gaba ɗaya, sannan ka ɗaga shi ya fito.

Taya murna! Ka yi wa sabon mabiyin Yesu baftisma - sabon ɗan ƙasa na sama - sabon ɗan Allah Mai Rai. Lokaci ne na murna!